- Umwanditsi, Jean Claude Mwambutsa
- Igikorwa, BBC Gahuzamiryango i Gatsibo
- Yatangajwe
- Igihe co gusoma: iminota 3
Imbuga nkoranyambaga zagufasha mu bucuruzi bwawe, wazifashisha wongera ubumenyi kandi mu buryo butaguhenze, niko Isimbi Shemsa, umukobwa ukiri muto wo mu karere ka Gatsibo mu Rwanda, abibona.
Uno mukobwa avuga ko imbuga nkoranyambaga bamwe banenga zimufasha mu bworozi bwe yatangiye nyuma yo kurangiza amasomo ya Kaminuza mu bwikorezi(logistics) mu gihugu cy'Ubushinwa.
Nyuma yo gutaha mu gihugu Shemsa avuga ko yabonye nta kazi kamunyuze kaboneka kandi iwabo hari ahantu yakorera ubworozi. Kubera ko atari afite ubumenyi bwinshi, uyu mukobwa yahisemo kwihugura akoresheje imbuga nkoranyambaga.
Yashoboye kubona amakuru ku buryo bwo korora imbata, inkoko n'inkwavu abikesha aborozi bo mu bindi bihugu byakataje.
Yagize ati: "Nk'ubu bworozi bw'imbata nabukuye mu gihugu cya Indonesia. Nk'aha norora inkoko ijana, hasi ijana, n'izindi hejuru kandi ntaho amatotoro (imyanda yazo) ahurira n'aho zirara. Abantu nkurikira cyane ni abo kuri Tiktok. Kandi abo nkurikira ni bo bangeza ku bandi. Iyo urebye video z'umworozi ubikora neza ukuramo ubumenyi butari bucye".
Hari bamwe basanga imbuga nkoranyambaga ari iz'abatagira icyo bakora. Gusa Shemsa Isimbi, umukobwa wo mu karere ka Gatsibo we avuga ko zishobora gukoreshwa mu kwiteza imbere. We yahisemo kwifashisha urubuga rwa Tiktok mu bworozi bw'amatungo magufi arimo inkoko n'imbata.
Mu cyaro cya Kiramuruzi aho akorera, Shemsa avuga ko mu buryo busanzwe bitamworohera kubona amakuru byoroshye.
Ati: "Kubera ko interineti yashoboye kugera no muri iki cyaro cyacu (aseka) uhura n'ikibazo ukajya kuri interineti ukabaza, 90% by'abantu bangurira mbakura ku mbuga nkoranyambaga.
"Kuri njyewe interineti ni byose kuko wacuruza, wakorora nkanjye kandi amakuru ukayabona utavuye aho uri."
Ubu buryo bwatumye uyu mukobwa ashobora kuzigama amafaranga yari gutanga ku ngendo ndetse n'amahoteli agiye gushaka amahugurwa. Avuga kandi ko yabonye n'umwanya uhagije wo kuba hafi y'ubworozi bwe.
Agira ati: "Kuri ubu iyo inkoko irwaye sinkenera guhamagara umuganga, mpita njya kuri Tiktok nkabaza aborozi bafite ubumenyi kundusha. Abantu bangurira na bo, cyangwa se nanjye abo nguraho icyororo, bose mbasanga ku mbuga nkoranyambaga."
Hari abatari bake bemeza ko imbuga nkoranyambaga zangiza urubyiruko ndetse impaka zikomeje kuba nyinshi ku mikoreshereze yazo.
Gusa Shemsa we avuga ko izi mbuga zidakwiye kwamaganwa ahubwo ko abantu bakwiye gutekereza ku cyo bazishakaho.
"Ese kuki ntashakaho ibijyanye n'ibyo nkora. Ntiwite gusa ku byo amaso yawe aguhatira kureba, bimaze iki kwirirwa mu bitagufitiye akamaro?"
Mu gihe imirimo igenda iba micye, Isimbi avuga ko imbuga nkoranyambaga zishobora gufasha urubyiruko guhanga imirimo.
Agira ati: "Uzi ko wareba umucuruzi muturanye ukamusaba kumwamamariza ukoresheje izo mbuga akaguhemba? Birashoboka ko mwakumvikana akajya aguhemba ku kintu cyagurishijwe kubera ko wacyamamaje, aho kwirirwa muri videwo zitesha agaciro bagenzi bacu."
Uyu mukobwa avuga ko imbuga nkoranyambaga nk'urwa Tiktok akoresha atari mbi bitandukanye n'ibyemezwa n'abiganjemo abakuze.
Gusa ngo bisaba kumenya icyo ukeneye, kwiyima ibirangaza bimwe na bimwe ndetse no gushirika ubute.
Shemsa avuga ko yabanje kugorwa no kumvisha abo babana ko telefoni ye ari byose, cyakora ngo kuri ubu nta n'umwe ugiterwa impungenge n'imyitwarire yagira ku mbuga nkoranyambaga.