O Festival Internacional de Documental Etnografico de Sobrarbe torna a sacar o cine d'as salas ta portar-lo ta las plazas d'os lugars con a sietena edición d'Espiello baixo as estrelas, una iniciativa que acerca o millor documental etnografico a catorce localidatz de diez municipios de Sobrarbe entre o 23 de chulio y o 27 d'agosto.
L'obchectivo d'o ciclo, organizau por a Comarca de Sobrarbe y o suyo Servicio de Cultura, va muito mas allà d'ofrir cine a l'aire libre durant l'estiu. Por meyo d'o documental etnografico, Espiello convida o publico a conoixer atras trazas d'entender o mundo, comunidatz, tradicions, oficios, conflictos y maneras de vivir que, siga a milars de quilometros u en o lugar vecino, charran d'historias universals.
“Cada prochección se convierte asinas en una oportunidat ta conoixer nuevas realidatz, conservar a memoria colectiva y favorecer o diálogo entre culturas dende una uellada respetuosa y cercana”, destacan dende a organización.
Amás d'amostrar historias de diferents lugars d'o mundo, a programación mete tamién o foco en o territorio y en a vida rural, reforzando o compromiso d'Espiello con a conservación d'o patrimonio cultural inmaterial y con a difusión d'as historias que naixen en o meyo rural aragonés.
Dimpués d'a XXIII edición d'Espiello, Festival Internacional de Documental Etnográfico de Sobrarbe, que se celebró en Boltanya o pasau mes de marzo, y como en edicions anteriors, ueito d'as sessions se ferán en formato dixital de gran pantalla y as seis restants plegarán ta os nuclios mas chicots por meyo d'un camión que se tresforma en un cine itinerant. “Quan cae a nueit, as plazas recuperan l'ambient d'o cine d’estiu de toda a vida: vecins, vecinas y visitants comparten una experiencia colectiva que continan dimpués d'a proyección con conversacions, charradas y reflexions naixidas d'as historias vistas en pantalla”, destacan as responsables de l'evento.
A excelent acullida d'as edicions anteriors confirma l'éxito d'iste formato de festival estendiu, que permite d'acercar o cine documental a tota a comarca de Sobrarbe y fer d'a cultura un punto d'encuentro entre cheneracions.
A selección d'iste anyo preposa un recorríu por historias que charran d'identidat, memoria, resistencia, migracions y vida rural, amostrando que o documental etnografico ye una ferramienta privilechiada ta comprender tanto o que nos diferencia como aquilo que compartimos.
Entre os documentals mas demandaus ta la suya proyección ocupan un puesto important as produccions que tienen como protagonista a Sobrarbe y a as suyas chents, como 21.000 palabras (un capezuto e dos collons), dirichida por Maxi Campo, rechirada en Espierva y premiada en diferents festivals, Cuatro casas, dirichida por Jesús Bosque, que narra a importancia d'a casa en l'Alto Aragón, Inadaptados, realizada por o taller de teatro social impartiu por Charlotte Bouguet en o Centro Valentia de Boltanya, u El cordero de Casa Torres, una curta oda familiar de Sant Chuan de Plan. Chunto con istas, produccions laureadas que nos acercan a historias y chents d'a India en Village of Bastards, d'o Tigray, en Etiopía, con La fuerza del silencio, y d'o Senegal en Los cayucos de Kayar.
O festival contina en verano con tamién con Espiellé
Amás d'o ciclo Espiello baixo as estrelas, o festival contina con atras actividatz durant l'estiu y, en o mes d'agosto, tornará a Broto a muestra de cine de montanya Espiellé, que celebrará a suya dotzena edición.
A programación d'Espiello baixo as estrelas s'ha elaborau un anyo mas en colaboración con os ayuntamientos participants: Abizanda, L'Aínsa-Sobrarbe, Bárcabo, Boltanya, Broto, Fanlo, A Fueba, Chistén, Plan y Puértolas.
Programación d'Espiello baixo as estrelas
Totas as procheccions prencipiarán a las 22:00 horas y serán de dentrada libre dica completar l'aforo.
- Chueves 23 de chulio – Escanilla: 21.000 palabras (un capezuto e dos collons).
- Chueves 30 de chulio – Campodarbe: Village of bastards.
- Viernes 31 de chulio – Margudgued: La fuerza del silencio y La chica de la orquesta.
- Chueves 6 d'agosto – Broto: Inadaptados y Cuatro casas. En Sieste: Los cayucos de Kayar.
- Viernes 7 d'agosto – Bárcabo: De todos lados un poco.
- Luns 10 d'agosto – Guaso: Cuatro casas.
- Martes 11 d'agosto – Puyarruego: Cuatro casas.
- Chueves 13 d'agosto – Chistén: La fuerza del silencio, Cuatro casas y El cordero de Casa Torres.
- Miércoles 19 d'agosto – Tierrantona: Cuatro casas.
- Chueves 20 d'agosto – Plan: La fuerza del silencio, Cuatro casas y El cordero de Casa Torres.
- Viernes 21 d'agosto – Coscochuela: La fuerza del silencio y Los cayucos de Kayar.
- Sabado 22 d'agosto – Yeba: Cuatro casas.
- Chueves 27 d'agosto – Lamata: El cordero de Casa Torres y Cuatro casas.
Una propuesta ta acercar o cine a tot o territorio
Con ista nueva edición, Espiello baixo as estrelas reafirma a suya vocación de fer arribar o cine documental a tot o territorio, fendo d'as plazas d'os lugars un espacio compartiu ta la cultura, a conversación y a reflexión colectiva.
A iniciativa torna a amostrar que o documental etnografico ye una ferramienta privilechiada ta conoixer atras culturas y maneras de vivir, pero tamién ta valorar a riqueza d'o patrimonio cultural y humano de Sobrarbe y d'o meyo rural aragonés.