Wall Street Journal: Marekani yashambulia meli ya mizigo baada ya kupuuza kizuizi cha majini cha Iran
Awali, kulingana na Taasisi ya Vanguard inayojihusisha na
shughuli za uokoaji wa meli, tuliripoti kuwa meli ya mizigo yenye bendera ya
Panama ilishambuliwa kwa kombora kutoka kwenye helikopta wakati ikisafiri
kutoka magharibi kuelekea mashariki kupitia Bahari ya Oman, karibu na pwani ya
Pakistan.
Sasa, gazeti la Wall Street Journal limemnukuu afisa wa
Marekani akisema kuwa helikopta ya kijeshi ya Marekani ilifyatulia risasi
katika sehemu ya mwongozo ya meli hiyo, baada ya wafanyakazi wa meli hiyo ya
mizigo kupuuza maonyo ya kutovunja kizuizi cha majini kilichowekwa na Iran
dhidi ya bandari zake.
Sehemu ya kuiongoza meli ni kifaa chenye umbo la bapa wima
kilichopo chini ya meli ndani ya maji, ambacho hutumika kuiongoza meli hiyo.
Ripoti hiyo inaeleza kuwa meli hiyo inaonekana kujaribu
kuhamishia wafanyakazi wake kwenye meli nyingine ya kiraia baada ya
kushambuliwa.
Mkuu wa ujasusi Libya auawa
Jeshi la
Libya limesema katika taarifa yake siku ya Jumanne kwamba mkuu wa kitengo cha
ujasusi wa kijeshi wa Jeshi la Kitaifa la Libya,ambalo linadhibiti maeneo ya
mashariki na sehemu za kusini mwa nchi hiyo,aliuawa katika shambulio la bomu
lililotegwa kwenye gari.
Kwa mujibu
wa shirika la habari la serikali la Agence France-Presse, taarifa hiyo ilieleza
kuwa Fawzi Mansouri aliuawa siku ya Jumatatu baada ya bomu lililokuwa limetegwa
kwenye gari lake kulipuka wakati akitoka katika msikiti mmoja wa eneo hilo
usiku.
Tukio hilo
lilitokea katika mji wa Benghazi, mashariki mwa Libya.
Libya
imekumbwa na vita vya wenyewe kwa wenyewe pamoja na ukosefu wa utulivu tangu
kuuawa kwa kiongozi wa zamani Muammar Gaddafi mwaka 2011.
Kwa sasa,
serikali mbili zinashindania udhibiti wa Libya, serikali inayotambuliwa na
Umoja wa Mataifa yenye makao yake Tripoli ikiongozwa na Abdelhamid Zeiba, na
upande wa Khalifa Haftar, kamanda wa Jeshi la Kitaifa la Libya mjini Benghazi.
Katika
taarifa yake, Jeshi la Kitaifa la Libya lilielezea mauaji ya Mansouri kama
"kitendo cha kigaidi na cha woga" na kusisitiza kuendelezwa kwa
"mapambano dhidi ya ugaidi pamoja na juhudi za kuleta utulivu na usalama
nchini Libya.
Forest yamnasa beki wa Sporting Diomande
Nottingham
Forest imemsajili beki raia wa Ivory Coast, Ousmane Diomande, kutoka klabu ya
Ureno ya Sporting kwa ada inayokadiriwa kuwa pauni milioni 34.
Mchezaji
huyo mwenye umri wa miaka 22 amesaini mkataba wa miaka minne na Forest, ambao
wana chaguo la kuongeza mkataba huo kwa mwaka mmoja zaidi.”
"Nina
furaha kubwa kuwa hapa. Hii ni klabu yenye historia, na kujiunga na klabu kama
hii kunanipa motisha," alisema Diomande.
"Ninaamini
tunaweza kufanya mambo makubwa msimu huu na ninatarajia kukutana na wachezaji
pamoja na kocha mkuu. Nitajituma kadiri ya uwezo wangu."
Kocha mpya
wa Forest, Oliver Glasner, anapendelea mfumo wa 3-5-2 na kuna uwezekano mkubwa
Diomande akacheza sambamba na Nikola Milenkovic na Murillo.
Alichezea
timu ya taifa ya Ivory Coast mara 15 na alikuwa sehemu ya kikosi cha nchi yake
katika Kombe la Dunia la 2026, ambapo alicheza mechi moja katika ushindi wa
hatua ya makundi dhidi ya Curacao.
Diomande
alianza taaluma yake katika klabu ya Olympic Sport Abobo nchini kwao na aliwahi
kuichezea klabu ya Denmark ya FC Midtjylland kabla ya kujiunga na Sporting
mnamo Januari 2023.
Libya yapambana na moto katika kiwanda kikubwa cha mafuta
Libya yapambana na moto katika kiwanda kikubwa cha mafuta
Huduma za dharura za Libya zimekuwa zikipambana kudhibiti
moto mkubwa katika kiwanda cha mafuta baada ya kulengwa na washambuliaji
wasiojulikana.
Kiwanda cha kusafisha mafuta cha Zawiya, magharibi mwa mji
mkuu Tripoli, kilishambuliwa na ndege isiyo na rubani siku ya Jumatatu jioni,
tukio la tatu kama hilo ndani ya siku mbili.
Shirika la Kitaifa la Mafuta (NOC) lilisema tanki lenye
takriban lita milioni 4.5 za mafuta lilishambuliwa moja kwa moja, na
kusababisha moto mkubwa. Lilisema linafikiria kusimamisha shughuli ikiwa
mashambulizi yataendelea
Hakukuwa na "majeruhi wengi" kutokana na moto huo,
huku walioathirika na moshi wakipewa matibabu, kwa mujibu wa shirika la Huduma
na Dharura la Libya.
Kiwanda cha mafuta cha Zawiya ndicho kikubwa zaidi nchini
Libya, chenye uzalishaji wa mapipa 120,000 kwa siku.
NOC ililaani mashambulizi kama hayo katika siku zilizopita
huko Zawiya, ikiwa ni pamoja na mashambulizi mawili ya ndege zisizo na rubani
kwenye hifadhi ya Naphtha na kiwanda cha kuondoa chumvi kwenye maji.
NOC ilitoa wito kwa mamlaka kuchunguza ni nani
aliyesababisha vurugu hizo.
Dikteta wa Syria aliyeondolewa madarakani, Bashar al-Assad, ahukumiwa kifo
Mahakama ya
Syria imemhukumu kifo dikteta aliyeondolewa madarakani Bashar al-Assad licha ya
kutokuwa mahakamani, baada ya kumpata na hatia kwa makosa ya kivita na uhalifu
dhidi ya binadamu wakati wa vita vya wenyewe kwa wenyewe nchini humo.
Assad alikimbilia
Urusi pamoja na familia yake baada ya utawala wake kupinduliwa mwezi Desemba mwaka
2024, jambo lililohitimisha utawala wa familia yake uliodumu kwa miongo mitano.
Katika kesi
hiyo hiyo, mahakama pia ilimhukumu kifo Atef Najib, binamu yake Assad na
aliyekuwa mkuu wa usalama wa kisiasa katika jimbo la Deraa kusini mwa Syria.
Alionekana
akiwa ndani ya kizimba mahakamani wakati jaji akisoma hukumu yake. Jimbo la
Deraa linachukuliwa kwa kiasi kikubwa kuwa mahali ambapo vuguvugu la uasi dhidi
ya utawala wa Assad lilianzia.
Mnamo Machi
2011, kukamatwa na madai ya kuteswa kwa kundi la vijana walioshtakiwa kwa
kuandika maandishi ya kupinga serikali kwenye kuta kulichochea maandamano
jijini humo, ambayo yalikabiliwa na ukandamizaji mkali kutoka kwa vikosi vya
usalama.
Hatua hiyo
ilichochea maandamano nchi nzima yaliyogeuka kuwa vita vya wenyewe kwa wenyewe
vilivyosababisha vifo vya mamia ya maelfu ya watu.
Serikali ya
mpito ya Syria ilianza kuwashtaki maafisa waliohusishwa na utawala wa Assad
ambao ulitawala nchi hiyo kwa zaidi ya miaka 50, mapema mwaka huu.
Najib ni
mmoja wa maafisa wa ngazi ya juu kabisa kufikishwa mahakamani.
Urusi yatumia makombora ya Korea Kaskazini kushambulia Ukraine - Zelensky
Ukraine na
Urusi zimeendelea kushambuliana usiku kucha, huku Rais wa Ukraine Volodymyr
Zelensky akiishutumu Moscow kwa kutumia makombora ya Korea Kaskazini.
Zelensky
alisema mashambulizi yaliyotokea Zaporizhzhia, yaliyosababisha vifo vya watu
wasiopungua sita na kujeruhi takriban 19, yalihusisha makombora ya masafa ya
kati yaliyotolewa na mshirika wa Urusi, Korea Kaskazini.
Nchini
Urusi, katika mji wa Voronezh kusini mwa nchi hiyo, maghala ya kampuni ya
biashara mtandaoni ya Wildberries yalilengwa na mashambulizi ya Ukraine.
Kampuni hiyo, inayofahamika kama "Amazon ya Urusi", imekuwa
ikishambuliwa mara kwa mara katika wiki za hivi karibuni.
Mashambulizi
hayo yamekuja siku moja baada ya watu wasiopungua 13 kuuawa, akiwemo mtoto
mmoja, katika mashambulizi ya droni za Ukraine kwenye Jamhuri ya Tatarstan
nchini Urusi, zaidi ya kilomita 1,100 kutoka mpaka wa Ukraine.
Katika
hotuba ya video Jumatatu jioni, Zelensky alisema kuwa kwa mara ya kwanza Urusi
haiwezi kuendelea na vita bila msaada wa Korea Kaskazini.
"Kadiri
mashambulizi ya Korea Kaskazini yanavyoongezeka hapa Ukraine na Ulaya, na
kadiri makombora na wanajeshi wao wanavyotumiwa, ndivyo wanavyozidi kurekebisha
udhaifu na mapungufu yao," alisema Zelensky.
Aliongeza
kuwa hali hiyo inaweka dunia nzima katika hatari, kwani Korea Kaskazini inapata
uzoefu na kuboresha uwezo wake wa kijeshi kupitia vita hivyo.
Katika
hotuba yake, Zelensky pia alisifu shambulio la anga lililofanikiwa kulenga
kiwanda cha kemikali za petroli cha Urusi kilichoko magharibi mwa Siberia siku
ya Jumatatu, akilitaja kuwa "mafanikio makubwa sana" kwa jeshi la
Ukraine.
Aliahidi
kuwa kutakuwa na mashambulizi zaidi ya Ukraine ndani ya eneo la Urusi, akisema
hatua hizo zinapaswa kuonyesha kwa Urusi na raia wake kwamba amani ni muhimu na
ya lazima.
Ukraine yashambulia kiwanda kikubwa cha mafuta cha Urusi
Jeshi la
Ukraine linasema limeshambulia kiwanda cha kusafisha mafuta cha
Orsknefteorgsintez mjini Orsk, huko Orenburg.
Ukraine
inasema kuwa eneo hilo lililolengwa katika "shambulio la masafa
marefu" liko umbali wa kilomita 1,500 kutoka mstari wa mbele wa vita.
Inakitaja
kiwanda hicho kuwa "Mojawapo ya viwanda vikubwa zaidi" katika eneo
hilo na "shirika muhimu katika sekta ya mafuta na nishati ya Urusi".
"Moto
umeripotiwa kuzuka. Ukubwa wa uharibifu unafanyiwa tathmini ili
kufahamika," Makao Makuu ya Jeshi yanasema.
Rais
Zelensky hivi karibuni amesema kuwa mashambulio dhidi ya miundombinu ya nishati
yanalenga kupunguza mapato ya mafuta ambayo Urusi" inayatumia
kufadhili" vita.
Iran ilipe fidia kwa madhara iliyosababisha wakati wa vita - Trump
Rais wa Marekani Donald Trump amesema Iran inapaswa kulipa fidia kwa watu walioathiriwa na vifo na majeraha yaliyosababishwa na matukio mbalimbali katika kipindi cha miaka 50 iliyopita.
Trump amesema kauli hiyo inajibu madai ya Iran ya kutaka kulipwa fidia kwa uharibifu unaodaiwa kusababishwa na Marekani.
“Waliomba fidia, unaweza kusema, au waliomba fedha kwa ajili ya uharibifu ambao tumesababisha. Nikasema hilo ni wazo zuri. Basi nasi tutaomba fedha kwa ajili ya uharibifu ambao wao wamesababisha kwa kipindi cha miaka 50,” Trump amesema.
Ametaja pia shambulio la meli ya kijeshi ya Marekani USS Cole na watu waliouawa au kujeruhiwa katika matukio mbalimbali.
Trump pia amesema familia za watu waliouawa katika maandamano nchini Iran zinapaswa kulipwa fidia.
“Tunafikiri familia zao zinapaswa kupata fidia kwa kuuawa kwa mtu wao, mtoto wao, mama au baba yao waliokuwa wakiandamana,” Trump amesema.
Amedai kuwa watu 52,000 waliuawa katika maandamano nchini Iran katika kipindi cha miezi minne iliyopita, ingawa kauli hiyo BBC haijathibitisha kwa uhuru.
Safari ya ndege Canada yasitishwa baada ya mtoto kukataa kuketi
Ndege kutoka Canada imeghairiwa baada ya mtoto kukataa kufunga mkanda wa usalama, hali iliyozua mjadala kuhusu usalama na taratibu za watoto wanaosafiri kwa ndege.
Ndege ya kampuni ya Porter Airlines iliyokuwa ikijiandaa kuondoka Victoria kuelekea Toronto tarehe 6 Agosti, ilirudishwa eneo la kupandia abiria baada ya mtoto mdogo kusimama kwenye kiti chake na kukataa kufunga mkanda, kwa mujibu wa kampuni hiyo.
Kutokana na tukio hilo, ndege hiyo haikuweza kuondoka uwanjani. Abiria walilazimika kupangiwa safari nyingine siku iliyofuata.
Tukio hilo limeibua mitazamo tofauti kuhusu namna watoto wanavyopaswa kushughulikiwa katika mazingira kama hayo na hatua ambazo mashirika ya ndege yanapaswa kuchukua.
Porter Airlines imesema juhudi za mzazi aliyekuwa akiandamana na mtoto huyo pamoja na wahudumu wa ndege kutatua suala hilo hazikufanikiwa.
Kampuni hiyo imesema ndege haingeweza kuondoka katika hali hiyo kwa kuwa haikuwa salama. Kwa hiyo, wafanyakazi wa ndege waliamua kuirejesha katika eneo la kuanzia safari na kuwashusha abiria hao wawili.
Trump asema itakuwa 'kosa kubwa' Infantino akiondolewa
Rais wa Marekani Donald Trump amesema itakuwa kosa kubwa sana kumuondoa Gianni Infantino katika nafasi yake ya urais wa Shirikisho la Soka Duniani, FIFA.
Kauli ya Trump imekuja baada ya UEFA, Concacaf na Shirikisho la Soka la Asia, AFC, kumshutumu Infantino kwa kuvunja uaminifu kupitia pendekezo lake lililofutwa la uekezaji linalojulikana kama Fifa Forward Enterprise, FFE.
Pendekezo hilo lililenga kuunda kampuni mpya ya kusimamia haki za kibiashara na mauzo ya tiketi za mashindano yote ya FIFA, yakiwemo Kombe la Dunia, huku asilimia 21 ya kampuni hiyo ikiuzwa kwa kampuni binafsi ya uwekezaji.
Trump amesema FIFA itakuwa inafanya kosa kubwa ikiwa itafikiria kumwondoa Infantino.
“FIFA itakuwa inafanya kosa baya sana ikiwa, kwa sababu yoyote ile, itafikiria hata kumwondoa Rais Gianni Infantino,” Trump aliandika kwenye mitandao ya kijamii.
“Yeye ni mzuri sana, kwani hivi karibuni ameongoza Kombe la Dunia lenye mafanikio makubwa zaidi kuwahi kufanyika, mara nne zaidi. Ikiwa ataondoka, halitawahi kuwa na mafanikio au faida kubwa kama hiyo tena.”
Kombe la Dunia la mwaka 2026 liliandaliwa kwa pamoja na Marekani, Canada na Mexico msimu huu wa kiangazi, huku Hispania ikitwaa ubingwa baada ya kuifunga Argentina katika fainali.
Alipozungumzia kwa mara ya kwanza pendekezo la FFE tarehe 31 Julai, Trump alisema hajawahi kuzungumza na Infantino kuhusu mipango hiyo.
Thrive Eternal ilitarajiwa kuongoza kundi la wawekezaji lililopendekezwa kwa ajili ya FFE.
Thrive ni kampuni ya Marekani ya uwekezaji wa mitaji iliyoanzishwa na Joshua Kushner, ambaye ni kaka wa Jared, mkwe wa Trump.
Trump na Infantino wana uhusiano wa karibu.
Infantino alimtuza Trump Tuzo ya kwanza ya Amani ya FIFA mwezi Desemba 2025.
Tetemeko la ardhi Colombia lasababisha vifo vya zaidi ya watu 130
Takriban watu 132 wamefariki baada ya tetemeko kubwa la ardhi kupiga magharibi mwa Colombia, katika tukio kubwa zaidi la aina hiyo nchini humo kwa miaka kadhaa.
Tetemeko hilo lenye ukubwa wa 7.4 kwa kipimo cha Richter lilipiga jimbo la Chocó, kati ya miji ya Medellín na Cali.
Waokoaji wanaendelea kuwasaka manusura huku kukiwa na hofu kwamba baadhi ya watu wamenaswa chini ya majengo yaliyoporomoka. Idadi ya waliofariki inatarajiwa kuongezeka.
Katika mji mkuu Bogotá, miti na taa za barabarani ziliyumba kwa nguvu, ingawa hakukuwa na uharibifu mkubwa ulioripotiwa.
Tetemeko hilo pia lilihisiwa katika maeneo ya mbali, yakiwemo Venezuela, Ecuador na Panama.
Rais wa Colombia Abelardo de la Espriella, aliyeapishwa Ijumaa, ametangaza hali ya dharura.
Eneo la Risaralda, linalojulikana kwa uzalishaji wa kahawa, linaonekana kuathirika zaidi, huku mji wake mkuu Pereira ukiripotiwa kupata uharibifu mkubwa na nyumba kadhaa kubomoka.
Kenya yatuma ombi la kuandaa Mashindano ya Dunia ya Riadha 2029
Jiji kuu la Kenya, Nairobi, imewasilisha rasmi ombi la kuandaa Mashindano ya Dunia ya Riadha mwaka 2029, ikiwa na lengo la kuwa mji wa kwanza barani Afrika kuandaa mashindano hayo makubwa ya riadha.
Mji mkuu wa Kenya unashindana na London, Rome na Munich kuwania haki ya kuwa mwenyeji wa mashindano hayo.
Serikali ya Kenya imetoa dhamana ya kuunga mkono zabuni hiyo kikamilifu, ikiwemo kuboresha miundombinu, usalama na maandalizi ya kiutawala yanayohitajika kuandaa mashindano hayo.
Kenya tayari ina uzoefu wa kuandaa mashindano makubwa ya riadha.
Mombasa iliandaa Mashindano ya Dunia ya Mbio za Nyika mwaka 2007, huku Nairobi ikiwa mwenyeji wa Mashindano ya Dunia ya Riadha kwa Wanariadha walio chini ya miaka 18 mwaka 2017 na yale ya chini ya miaka 20 mwaka 2021.
Nairobi pia iliandaa Mashindano ya Riadha ya Afrika mwaka 2010.
Shirikisho la Dunia la Riadha, World Athletics, linatarajiwa kutangaza mji utakaokuwa mwenyeji wa mashindano ya mwaka 2029 mwezi Septemba.
Zambia yaelekea uchaguzi huku Hichilema akilenga muhula wa pili
Zambia itaelekea kwenye uchaguzi baada ya siku mbili, ambapo wananchi watapiga kura kumchagua Rais, wabunge na viongozi wa mabaraza ya serikali za mitaa.
Uchaguzi huo umetajwa kwa kiasi kikubwa kuwa ni ushindani wa wagombea wawili wakuu, kufuatia kuibuka kwa mgombea mmoja wa muungano wa upinzani.
Kwa mujibu wa Reuters, kura za maoni pamoja na wawekezaji wengi wanatarajia Rais Hakainde Hichilema kushinda muhula mwingine wa miaka mitano, akimshinda mpinzani wake Brian Mundubile, anayeongoza upinzani uliogawanyika.
Hata hivyo, Tume ya Uchaguzi ya Zambia inakabiliwa na moja ya mitihani yake mikubwa zaidi, huku ikisimamia uchaguzi wa kwanza unaotumia daftari jipya la wapiga kura na unaofanyika katika majimbo mapya ya uchaguzi. Masuala ya usalama wa kura, mvutano wa kisiasa na wasiwasi wa umma kuhusu uaminifu wa mchakato wa uchaguzi pia yameibua changamoto kwa tume hiyo.
Uchaguzi huo wa Agosti 13 umejikita katika ushindani kati ya miungano miwili mikuu ya kisiasa.
Muungano unaoongozwa na chama tawala cha United Party for National Development, UPND, unaungwa mkono na vyama vidogo 15.
Upande wa pili ni Tonse Pamodzi Alliance, unaoongozwa na mgombea urais Brian Mundubile na mgombea mwenza Makebi Zulu.
Muungano huo unajumuisha vyama vidogo visivyo na uwakilishi bungeni pamoja na sehemu kubwa ya miundo iliyosalia ya chama cha Patriotic Front, PF.
Mundubile aliwahi kuwa mwanachama wa PF, chama kilichoondolewa madarakani katika uchaguzi wa mwaka 2021.
Kwa mujibu wa sheria za Zambia, miungano ya kisiasa haiwezi kusajiliwa kama vyombo vya uchaguzi. Hivyo, wagombea wa miungano hiyo hulazimika kugombea kupitia chama kimoja, huku wakiungwa mkono na muungano usio rasmi.
Kuundwa kwa miungano ya upinzani si jambo jipya nchini Zambia. Takriban kila uchaguzi umekuwa ukishuhudia mazungumzo ya kuunganisha vyama vya upinzani, ingawa ni miungano michache iliyofanikiwa kudumu hadi wakati wa uchaguzi.
Mwaka huu, vyama vya upinzani viliungana katika hatua za mwisho za maandalizi ya uchaguzi, vikidai kukabiliwa na kile vinachokiita kuingiliwa kwa kiasi kikubwa na serikali.
Licha ya changamoto hizo, upinzani unasema una matumaini ya kushinda uchaguzi.
Jumla ya wagombea 14 wanawania urais, ingawa ni vyama vichache vinavyotambulika kwa kiasi kikubwa na wapiga kura.
Kwa mara ya kwanza katika kipindi cha miaka 30, hakuna chama chochote kilichowahi kuwa madarakani kinachowakilishwa kwenye karatasi ya kura ya urais. Soma Zaidi:
Trump asema atamjibu Netanyahu kuhusu mpango wa amani wa Gaza
Rais wa Marekani Donald Trump amesema hivi karibuni atajibu kauli ya Waziri Mkuu wa Israel Benjamin Netanyahu ya kuukataa mpango wa amani wenye vipengele 15 wa Baraza la Usalama la Umoja wa Mataifa.
Trump, akijibu maswali ya waandishi wa habari ndani ya Ikulu ya Marekani, amesema atachapisha majibu yake kwenye mtandao wake wa kijamii wa Truth Social.
Amesema pia uhusiano wake na Netanyahu bado ni “mzuri sana.”
Katika siku za hivi karibuni, kumekuwa na kusitishwa kwa mashambulizi ya Israel dhidi ya Gaza, angalau kwa kiwango fulani, jambo ambalo Hamas ililitaka wakati ilipokubali mpango wa vipengele 15 unaoungwa mkono na Marekani.
Pia kuna dalili nyingine kwamba Israel iko tayari kuendeleza mpango wa amani wa Rais wa Marekani Donald Trump kwa Gaza, ikiwa ni pamoja na maandalizi ya kupelekwa kwa Kikosi cha Kimataifa cha Kuleta Utulivu (ISF). Kikosi hicho kinaundwa na wanajeshi kutoka nchi mbalimbali, na mpango ni kwamba watashirikiana na kikosi kipya cha polisi wa Palestina katika kuhakikisha usalama wa eneo hilo.
Ujenzi wa kituo cha kwanza cha ISF bado unatarajiwa kuanza mwishoni mwa mwezi huu, miongoni mwa magofu ya Rafah, kusini mwa Gaza, kwa mujibu wa redio ya umma ya Israel, Kan News. Hatua hiyo itawezesha hatimaye kuanza kwa ujenzi upya wa eneo hilo.
Vikosi vinavyoiunga mkono serikali ya Yemen vimesema wapiganaji wa Houthi wameushambulia mji wa bandari wa Mukha.
Katika taarifa iliyochapishwa kwenye ukurasa wa jeshi la Yemen kwenye mtandao wa X, jeshi hilo limesema Wahouthi walifyatua makombora ya balistiki kuelekea mji huo uliopo katika pwani ya Bahari ya Shamu.
Jeshi hilo pia limesema maeneo na vituo kadhaa katika bandari ya Mukha vililengwa katika mashambulizi hayo.
Trump asema Marekani imeondoa mabomu ya baharini katika Mlango wa Hormuz
Rais wa Marekani Donald Trump amesema vikosi vya Marekani vimeondoa mabomu ya baharini katika Mlango wa Hormuz na kuifanya njia hiyo kuwa salama kwa usafiri wa meli.
Trump amesema Jeshi la Wanamaji la Marekani ndilo linalodhibiti kwa sasa Mlango wa Hormuz.
“Angalia, kwa sasa ni Jeshi la Wanamaji la Marekani pekee ndilo linalodhibiti Mlango wa Hormuz,” aliwaambia waandishi wa habari katika Ofisi ya Oval ya Ikulu ya Marekani.
Aidha Trump amesema Marekani imeweka kizuizi imara katika njia hiyo na inaruhusu kupita meli ambazo inataka.
“Tumeweka kizuizi kinachofanya kazi kikamilifu na kisichoweza kupenywa, kama ukuta wa chuma.”
Trump pia amesema baadhi ya mabomu ya baharini huwekwa katika njia hiyo, lakini vikosi vya Marekani huyagundua na kuyaondoa.
“Ni jambo gumu kidogo, bila shaka, kwa sababu wakati mwingine wanaweka mabomu ya baharini, lakini sisi tunayagundua. Unajua, tumeondoa mabomu mangapi katika njia hii yote ya majini,” Trump alisema.